La Coordinadora Ecoloxista denuncia irregularidaes nel proyectu de la Zalia

La Coordinadora Ecoloxista d'Asturies emitió esta mañana un comunicáu en que califica de "preocupante" que'l Gobiernu asturianu "saque por partes la información pública sobre grandes infraestructures". LaCoordinadora cuestiona que l'alministración emplegare esti procedimientu pa la tramitación de la Zona d'Actividaes Loxístiques d'Asturies en Xixón (Zalia) porque s'esta manera, asegura que "faense estudios menores onde ye difícil determinar l'impactu global d'estes actuaciones aisllaes".

La organización esplica que ye evidente la "interconexón" que tienen les grandes infraestructures rellacionaes cola ZALIA, polo que ve "más razonable" tramitar un solu proyectu y analizar un estudiu d'impactu estructural d'estes actuaciones, proponiendo amestar al espediente les obres previstes pa facer la carretera d'enllaz al puertu d'El Musel o los desmontes nel Altu Aboño. La Coordinadora Ecoloxista denuncia igualmente que se pretenda ufiertar como posibles otres alternatives p'allugar la Zalia en Carreño cuando rescampla de manera evidente nes declaraciones públiques de los promotores la voluntá de facela en San Andrés de los Tacones.

La Coordinadora Ecoloxista afirma que'l proyectu de la ZALIA, según ta presentáu, incumple directives comunitaries y asegura que'l proyectu mesmu nun tien sentíu cuando hai n'Asturies "proyectos de polígonos por parte del Gobiernu con dellos millones de metros cuadraos" citando los casos de Llorea en Xixón con 1,2 millones de metros o Carreño, onde'l polígonu de Granda II va poner en mercáu 316.000 metros de suelu industrial, amás de los metros de suelu industrial que va apurrir l'ampliación d'El Musel .