La Coordinadora Ecoloxista alerta de que les agües residuales de Morcín y La Ribera van parar al Caudal

|
La Coordinadora Ecoloxista alerta de que les agües residuales de Morcín y La Ribera van parar al Caudal

"Continúen en plenu sieglu XXI", denuncia la Coordinadora Ecoloxista d'Asturies, que tamién critica la basura esistente en tol calce del ríu Caudal nel so pasu per Morcín y La Ribera. Nel casu concretu de Santolaya, avisa de que van la totalidá de les agües residuales del conceyu pese a la esistencia d'un emisariu.

Na capital de Morcín van direutamente al ríu Morcín nel puntu xustu de la so desembocadura nel Caudal "a pesar de que yá se construyó un emisariu d'agües residuales que sal de Santolaya y va en direición a la depuradora de Les Caldes. Paez ser qu'esta obra, en dalgún de los sos tramos entovía nun ta finada y los arramaos siguen produciéndose, de forma illegal dafechu, nel ríu".

Mentes, nel casu de La Ribera, al Caudal van una parte de les agües residuales "ensin depuración" nel puntu onde s'acondicionó una zona pa la prautica del piragüismu. "Compartimos la so necesidá pero creemos que ye un sarcasmu que se quiera dar un usu llúdicu y deportivu al ríu cuando entovía se siguen vertiendo al mesmo les agües residuales ensin que se faiga nada pa evitalo", afirmen los ecoloxistes.

Ensin campaña de llimpieza

La suciedá esistente nel calce del Caudal al so pasu per Morcín y La Ribera tamién provoca les crítiques de la Coordinadora Ecoloxista d'Asturies pol fechu de que "nunca se faiga campaña de llimpieza nenguna por parte de les alministraciones llocales responsables". Por último, afirma que "ye llamentable que dalgunos coleutivos se quexen frecuentemente de la presencia d'animales de tipu diversu, como les mabees, los xabalinos y los llobos, y faigan la vista gorda o inoren la contaminación de los suelos, l'aire y les agües de la zona".

Na imaxe, l'arramaú de Santolaya.

Contador Estadistiques