La Coordinadora denuncia la reapertura ensin permisos de la cantera de Llera

|
La Coordinadora denuncia la reapertura ensin permisos de la cantera de Llera

El coleutivu ecoloxista dio conocimientu de los fechos a la Conseyería d'Emplegu, Industria y Turismu, y al Conceyu de Grau.

Un españíu fuerte la selmana pasada, que fixo vibrar les viviendes de Somines y Nalió, alertó a los vecinos de la zona. La cantera de Llera, conocida como Peñon de Valverde, tenía traxín otra vuelta.

"Pa ellos foi una sorpresa en cuanto la esplotación llevaba unos años zarrada dende que la titular Canteras Industriales SA (Catisa) suspendiera pagos. Los vecinos nun tuvieron conocimientu del cambiu de titularidá de la mesma, nin del cambiu de titulares del restu d'instalaciones industriales diferenciaes nel complexu, nin de la tramitación nueva de les llicences d'actividaes correspondientes, o de la renovación del permisu de llabores de la esplotación minera", apunten dende la Coordinadora Ecoloxista d'Asturies, que recuerda que'l titular de Catisa, el Grupo Martínez Núñez, ta "investigáu por diferentes delitos onde tán involucraes delles alministraciones que collaboraron dende'l so silenciu o la so complicidá en facilitar les irregularidaes cometíes pol Grupo contra'l mediu ambiente y el patrimoniu, como los asocedíos en Grau nos años últimos, pendiente de resolvese".

Los ecoloxistes añaden que nel complexu industrial de Llera, amás de la cantera, "hai delles instalaciones en situación d'irregularidá que desconocemos si tienen o non yá autorización del Principáu, ya que dalgunes taba tramitándoles el titular anterior y los sos testaferros nel momentu de la suspensión de pagos, ensin atender les alegaciones y recursos que presentamos". "Ye polo qu'esperemos que les alministraciones investiguen estos fechos y sancionen a los titulares nuevos al tar trabayando ensin les autorizaciones correspondientes, al facese ensin preservar l'interés xeneral de los vecinos de Grau afeutaos pola esplotación, porque del Principáu esperamos poco al ser de toos conocíu'l coladeru que ye coles canteres", añadió.

Contador Estadistiques