La Coordinadora denuncia’l dragáu que ta faciendo la Confederación Hidrográfica nel ríu Seya

|

D’esperate. Asina calificó la Coordinadora Ecoloxista la decisión de la Confederación Hidrográfica del Cantábricu (CHC) de dragar el ríu Seya al altor de Les Arriondes. Los ecoloxistes denunciaron esta actuación énte la Fiscalía y la conseyería.

Según espliquen dende la Coordinadora Ecoloxista d'Asturies, la CHC “ta faciendo unos dragados desproporcionaos al altor de Les Arriondes, costume que, de forma equivocada, creíamos erradicada, daos los daños evidentes y estrozos medioambientales que supón y los beneficios nulos de control d’aveníes a mediu y llargu plazo que xeneren estes aiciones, en vista d’esperiencias similares n’otros llugares”. Los ecoloxiste destaquen la so sopresa pol fechu de que’l responsable d’estos trabayos sía un organismu que forma parte del Ministeriu d’Agricultura, Alimentación y Medio Ambiente que “debería de velar pola proteición del ecosistema fluvial y non facer obres que namái paecen encaminaes a afeutalu d’una manera tán gafa”.

La presencia d’una especie tán amenaciada como’l salmón atlánticu convierte al Seya nun Llugar d’Importancia Comunitaria (LIC), polo que “cualquier obra en dichos llugares necesiten de la previa aprobación d’una Evaluación Preliminar d’Impautu Ambiental (EPIA), de la que nun tenemos constancia”, apunten dende la Coordinadora, que tamién avisa de la esixencia de contar con un Estudiu d’Impautu Ambiental al tar el ríu tamién incluyíu na Rede Natura 2000. D’igual forma, los ecoloxistes aseguren que los trabayos en Les Arriondes destruyeron l’esgüeve fechu en primavera y branu por exemplares de llamprea, especie catalagoda como ‘vulnerable’ nel Catálogu d’Especies Protexíes del Principáu d’Asturies, una infraición mui grave según la Llei 4/1989, del 27 de marzu, de Conservación de los Espacios Naturales y de la Flora y Fauna Montesa, y la Llei del Principáu d’Asturias 6/2002, del 18 de xunu, de Proteición de los Ecosistemes Acuáticos y de Regulación de la Pesca n’Agües Continentales. Amás, podría ser delitu tomando como referencia l’artículu 334 del Códigu Penal.

Por estos motivos, la Coordinadora nun duldó en denunciar esta situación énte la Fiscalía de Mediu Ambiente y la Conseyería d’Agroganadería y Recursos Autóctonos pa que “actúen tal y como correspuende, impidiendo que se sigan produciendo actuaciones con tal nivel d’agresividá y estrozu medioambiental”, y esixan responsabilidaes.

 

Contador Estadistiques