La Conseyería de Cultura entregó ayeri los premios añales a la creación lliteraria y periodística en llingua asturiana.

Ismael María González Arias cola so novela "L'alcordanza del agua" algamó'l Xosefa Xovellanos de Narrativa, mientres que Xabiero Cayarga foi'l ganador del premiu Xuan María Acebal de Poesía pol poemariu "Les llingües de la hidra". Nos premios de periodismu "Enriqueta González Rubín" que se dixebren nuna estaya pa periodismu escrito y otra d'audiovisual los ganadores foron el periodista de Cangas del Narcea Cristóbal Ruitiña y el collaborador d'Asturies.com Inaciu Galán que llevó'l premiu pol so especial radiofónicu dientro del espaciu "Asina foi..el Surdimientu" sobre'l fallecimientu del escritor Mánfer de la Llera, un programa qu'apaeció na so versión escrita nel so día al traviés d'Asturies.com.

Ente los premiaos rescampla'l casu d'Ismael González Arias que repitió premiu al facese col Xosefa Xovellanos de Novela dempués de ganar l'añu pasáu l'Enriqueta González Rubín de periodismu por un artículu sobre la canción asturiana. El director de la Casa de Cultura de Mieres ye tamién la segunda vez que recibe'l Xosefa Xovellanos que yá algamare n'otra ocasión cola novela "El cuartu negociu". Na estaya de poesía, Xabiero Cayarga tien tamién el so nome puestu en dellos de los más importantes premios de poesía asturianos,ente ellos el Teodoro Cuesta, qu'algamare nel añu 2003 col poemariu "Pequeña Europa", amás d'otros reconocimientos como'l premiu de narraciones de l'Academia de la Llingua que consiguiere por "El boleru de Xabel" nel añu 1994.

En cuantes al premiu de periodismu, la estaya de periodismu escritu foi pa Cristóbal Ruitiña, xefe de prensa del Conceyu de Cangas del Narcea y collaborador davezu del selmanariu Les Noticies, mediu onde espublizó'l reportaxe ganador "Una historia de la mina poco conocida".

Amás de felicitar a tolos ganadores, dende Asturies.com congraciámonos especialmente pol premiu na estaya de periodismu audiovisual a Inaciu Galán (Xixón, 1986) collaborador d'esti mediu dende l'añu 2004 col so espaciu "Asina foi… el Surdimientu" un programa de la emisora lluanquina Onda Peñes en collaboración con Asturies.com nel que s'entrevista a los protagonistes del movimientu cultural asturianista dende los años 70 pa contra acá y nel que s'espublizó con motivu del fallecimientu del escritor Mánfer de la Llera n'abril d'esti añu 2005 esti especial.