La Confederación Hidrográfica multa a HC por vertíos en Somiedu

Los técnicos de la Confederación Hidrográfica del Norte (CHN) tienen propuesta una multa de cerca de 12.000 euros por vertíos de basa al ríu Somiedu a la empresa Hidroeléctrica del Cantábricu. Los fechos, que denunciare la organización política Andecha Astur, vienen d'últimos del pasáu branu, cuando la empresa eléctrica vació'l 26 de setiembre los banzaos de Somiedu y Saliencia, desaguando tamién con ellos una canal de de toma de la Central Hidroeléctrica de la Riera que contenía basa, afogando los pexes y vexetación del ríu a lo llargo de quince kilómetros, según la organización política denunciante.

La propuesta de sanción pon-y a la empresa una multa de 7.996 euros y una indemnización por daños por importe d'otros 3.998. Andecha Astur, que se personó nel casu independientemente de la investigación d'oficiu que yá taba abierta col oxetivu de llograr "una sanción de la máxima gravedá posible" asegura que la empresa fexo'l vertíu "clandestinamente y ensin contar con permisos de nenguna clase" afirma que la empresa "ye reincidente nestos atentaos mediuambientales".