La comunidá educativa celebra esti xueves una xornada contra la Llei Wert y los recortes nel sector

Esti xueves va tener llugar una movilización previa a la fuelga convocada na educación pública pal 9 de mayu. La comunidá educativa va entamar zarros y actividaes reivindicatives contra la Llei Wert y los recortes nel sector.

La FAPAS Manuel Virgós, Sindicato de Estudiantes, SUATEA, FETE-UXT y FE-CC OO convoquen esta protesta impulsada pola Plataforma Estatal en Defensa de la Escuela Pública que n’Asturies lleva’l nome de ‘Abraza la to escuela’. Ésta va consistir n’aiciones nos patios o na salida de los centros, amás de zarros nos centros, que terminarán con un abrazu simbólicu por parte de profesores y alumnos a les escueles. L’oxetivu ye “desixir la retirada d’una llei, la LOMCE, que quier acabar col enseñu públicu privatizándolu”, sometiendo al alumnáu a una carrera d’estorbises basada na segregación, qu’anula la participación de les families na educación de les sos fíes y fíos, que llanta un modelu empresarial nel enseñu y acaba colos derechos del profesoráu y coles aspiraciones a una educación laica, coeducadora, compensatoria de les desigualdaes y xestionada de manera democrática”.

Los convocantes soliciten el sofitu d’organizaciones sociales, cíviques, plataformes, coleutivos y entidaes contra “l’ataque ensin precedentes que supón la LOMCE y los recortes” que, aseguren, yá se tán notando nel nuesu país. En concreto, faen referencia al aumentu d’alumnos y alumnes per aula, sobre manera n’Infantil, Bachilleratu, FP y enseñances de réxime especial; a la supresión de places de profesoráu definitivu y la precarización del emplegu interín; al zarru d’aules nel ámbitu rural; y a la mengua de les ayudes y beques pa la merca de material escolar, tresporte o comedor, ente otres munches midíes. Les protestes de mañana van completase’l 9 de mayu con una fuelga en tol Estáu y una manifestación n’Uviéu, a partir de les 18 hores, con salida na Estación del Norte (RENFE).