La Comuna d'Asturies y FAMYR informen sobre'l procesamientu de Martín Villa por Servini

|
Concentración en Xixón Derechos Humanos xuiciu a Martín Villa

Entamen trés actos n'Avilés, Uviéu y Xixón cola participación del vascu Josu Ibargutxi.

El Xulgáu Nacional Criminal y Correccional Federal 1 de Buenos Aires dictó un autu estensu con fecha del 15 d'ochobre nel qu'alcuerda procesar al ex ministru Rodolfo Martín Villa por cuatro homicidios agravaos –asesinatos–, nun contestu de crímenes contra la humanidá, al tiempu que sigue cola investigación de los otros ocho polos que ta imputáu. La xueza María Servini abrió hai once años una investigación sobre los crímenes del franquismu tres una denuncia de familiares de víctimes, la conocida como Querella Arxentina.

Pa informar sobre la situación d'esta causa La Comuna d'Asturies, que forma parte de la Coordinadora estatal d'Apoyu a la Querella Arxentina contra Crímenes del Franquismu (CeAQUA), y la Federación Asturiana Memoria y República (FAMYR) entamen trés actos esta selmana al que conviden a Ibargutxi, miembru de Goldatu y de la Plataforma Vasca para la Querella contra los Crímenes del Franquismo. Prisioneru del franquismu dende'l 1968 al 1977 y querellante na Querella Arxentina, viaxó a Buenos Aires pa declarar énte Servini.

La primer cita, siempre a les 19 hores, va ser mañana nel avilesín Palaciu de Valdecarzana, actu nel que tamién van tomar parte Jesús Gómez, de FAMYR, y Francisco Javier Rodríguez Amorín, de La Columna d'Asturies. El xueves, nel Atenéu Obreru de Xixón, Ibargutxi va tar acompañáu por Luis Pascual, del propiu Atenéu, y Carme Prado, de La Columna d'Asturies; y el vienres, nel Cibercentru de La Lila, por Tino Brugos, tamién de La Columna d'Asturies.

Na semeya, concentración 'Contra la impunidá, verdá, xusticia y reparación. Contra'l silenciu y l'olvidu' celebrada'l vienres en Xixón con motivu del setentenu tercer aniversariu de la Declaración Universal de los Derechos Humanos, entamada poles dos organizaciones.

Contador Estadistiques