La Col.lá Propinde ta pa presentar discu nuevu

El grupu de folk asturianu " La Col.lá Propinde" ta rematando estos díes lo que va ser, d'equí a la vuelta de pocos díes el so segundu trabayu discográficu, que va entitulase "Güeria". El discu, que ta agora p'acabar la fase de producción, va salir a la venta a últimos de payares cola casa de discos avilesina L'Aguañaz dempués de que'l grupu pasare los últimos díes de setiembre y primeros d'ochobre grabando los cantares del LP nos estudios "Tutu" de Corvera, onde contaron cola producción de Sergio Rodríguez
.

Yá a primeros del branu acabante pasar, el grupu dio un adelantu nel conciertu que diere na Foguera de San Xuan na playa de Poniente de Xixón de dellos de los temes que diben enxertase nesti "Güeria" que'l mesmu grupu define como "un discu fresco y potente, nel que lo innovador amiéstase colo tradicional d'una manera sublime dende la xuntura de snes tradicionales con creaciones nueves".

El grupu l.lenizu La Col.lá Propinde vien llevando una trayectoria ascendente dende va unos meses p'acá, participando en bien de conciertos fuera d'Asturies, ente ellos una mini xira per Málaga y tamién nel país, tocando nes Feries de la Pola o nel "Festival + o - Celta" de Baiña.

Enantes d'entrar a grabar esti discu, el grupu participó a mou d'entrevista y cediendo los derechos de dellos de los sos temes nel curtiu ganador del concursu "Nun nos cuentes películes, failes" el proyectu "Suena´l camín" que va presentase nel Festival Internacional de Cine de Xixón, que va celebrase ente'l 27 de payares y el 2 d'Avientu. El curtiu, nel que La col.lá propinde punxo la banda sonora, trata ente otres coses, de los problemes qu'alcuentren los grupos de música pa salir alantre nel panorama artísticu, analizándose dende'l punto de vista de grupos que trabayen n'estremaos estilos del panorama musical, apaeciendo pela cinta, amás de la xente de "La Collá Propinde" grupos como Pingüinos Asesinos, Adición Etílica, Dixebra , Los Berrones, o'l raperu Dark la eMe.