La coalición Unidá preséntase con Ignaciu Llope de candidatu

La coalición "Unidá" que va presentase a les proximes elecciones del 27 de mayu axuntando les sigles d'Andecha Astur, Izquierda Asturiana y Los Verdes-Grupu Verde va facer esti llunes 9 d'abril la so presentación oficial. L'actu, que va tener llugar nun hotel de la capital asturiana, va valir pa dar a conocer al médicu y escritor Ignaciu Llope como candidatu a la presidencia d'Asturies pola coalición.

Xunto con elli van tar los representantes d'AA Germán Abad y d'IAS, Faustino Zapico, nun actu en que tamién va dase a conocer el decálogu de puntos básicos de la coalición, que naz "col envís de defender la identidá asturiana, el nuesu territoriu, el derechu a decidir el nuesu futuru como país y un modelu social, económicu y ecolóxicu verdaderamente afitáu na xusticia social, la defensa de los servicios públicos, la democracia participativa y les polítiques sustentables". Les formaciones qu'igüen "Unidá" presenten la coalición como un proyectu nel que "ensin renunciar al nuesu programa de máximos" pueda llograse un estatutu "que reconoza'l nuestru estatus como nación, el derechu a decidir el nuesu futuru, la oficialidá de la llingua asturiana y que nos iguale col restu d'estatutos con calter nacional del estáu".

La coalición preséntase como un intentu pa "evitar que la mocedá asturiano se vea obligao a emigrar pa poder trabayar y pa "crear les condiciones pa que los que tán fuera d'Asturies puedan volver al so país".

La oficialidá y normalización social de la llingua apaecen como otru de los pegollos del programa de mínimos d'Unidá, que pide que se potencie'l so usu na sociedá asturiana "utilizándola de forma prioritaria na alministración y nos medios de comunicación públicos". El programa incluye tamién la "potenciación y defensa de la fala del Navia-Eo frente a los intentos espansionistes".

El decálogu de puntos mínimos d'Unidá ataca a les actuales polítiques del executivu PSOE-IX-BA, afirmando que ye preciso "exercer un control real sobre la ordenación del territoriu defendiendo la costa asturiana frente a la especulación y el procesu de marbellización" al empar que no social se "denuncien y tornen les polítiques represives y la criminalización de cualquier disidencia que se ta imponiendo dende'l gobiernu de la llamada Izquierda Plural". El mediu ambiente ye otru de los puntos programáticos fuertes, esixéndose la "paralización de les llinies d'alta tensión en construcción, los ciclos combinaos y los proyectos de banzaos" y esixéndose una "política enerxética ensin concesiones basada nun modelu mediuambiental con criterios susstentables y centráu nes necesidaes d'Asturies".