La ciudadanía va salir a la cai pa pidir la oficialidá del asturianu

Coincidiendo col Día de les Lletres, va tener llugar esti vienres n’Uviéu la manifestación de la Xunta pola Defensa de la Llingua Asturiana pa pidir la oficialidá del asturianu. Ésta va salir a les 19.30 hores de la Estación del Norte.

 

‘¡Da-y al play, movilízate! ¡L’asturianu, llingua oficial!’ ye’l lema escoyíu pola Xunta pola Defensa de la Llingua Asturiana pa la manifestación d’esta tarde que va percorrer les cais d’Uviéu dende la estación de Renfe al Teatru Campoamor, onde se celebra l’actu académicu del XXXII Día de les Lletres Asturianes. Dende’l coleutivu señalen qu’esta xornada “tien que ser de fiesta pa la lliteratura asturiana, pero tamién un momentu pa facer balance de la situación del idioma y reivindicar un estatus d’igualdá pa tola ciudadanía que quier usar l’asturianu como la so llingua de cada día”. La cercanía de les eleiciones ye pa la organización un momentu perbono de “da-y al play, de movilizase pa poder exercer los nuestros derechos y posibilitar la salvación del asturianu”.

 

Na convocatoria de la manifestación, la Xunta pola Defensa de la Llingua Asturirna critica “la presencia testimonial del asturianu nos medios de comunicación públicos y el so usu tan escasu pola Alministración asturiana”, lo que nun ayuda “a que la nuestra llingua gane prestixu y reconocimientu ente la xente”. D’igual forma, denuncia la precariedá de la llingua “nes primeres etapes educatives y en Secundaria” o la situación de la toponimia, aprobada en munchos conceyos pero que l’Alministración “nun usa”.

 

Ye por estos motivos polos que la organización convoca a tola ciudadanía pa que salga a la cai a defender lo sos derechos llingüísticos. “Vamos ponenos en marcha y demostra-yos que ye’l momentu, que nesta llexislatura tien que salir p’alantre la oficialidá y que nun van ser quién a paranos”, aseguren. Hai que destacar que pa promocionar esta movilización, la Xunta pola Defensa de la Llingua Asturiana fixo un vidiu que pudo vese estos díes na TPA y sentise l’audiu na RPA. Nél participen l’actriz María Cotiello, la presentadora y cantante Esther Fonseca y el músicu Xosé Antón ‘Ambás’. Pablo A. Quiroga foi’l realizador y Santi Fano, l’editor.