La charra d'Ástura va tratar de les fiestes y los bandos de Llanes

La especialista n'investigaciones patrimoniales y rituales festivos del oriente, Yolanda Cerra, va falar de les fiestes y bandos de Llanes. Va ser esti martes na charra mensual d'Ástura.

El nome específicu de la conferencia ye 'Fiestas y bandos en Llanes: entre la tradición y la innovación'. Asina, Cerra va centrar la charra nel raru sistema festivu de la villa de Llanes afitáu na caltenida rivalidá de trés bandos –la Madalena, San Roque y la Guía– qu'atropen en nidia competencia a la vecindá llanisca. "L'orixe políticu de los dos primeros bandos pel añu 1837 camudóse bien llueu nuna rivalidá ente barrios que foi a desaniciar el vieyu sistema festivu del Antiguu Réxime y a algamar, dende la marxinalidá, un asitiamientu central na vida de la villa. El movimientu románticu que s'esparde na dómina sofita'l descubrimientu de los vezos y costumes populares campesines y les élites enfótense na so potenciación: ramos, ḥogueres, cancios, dances, indumentaria –que se conoz como 'traxe d'aldeana' y 'de porruanu'–, que quieren asemeyar al vistíu y a les tradiciones del pueblu. La entrada d'un tercer bandu (la Guía) ye daqué carauterístico de Llanes, una singularidá antropolóxica", espliquen dende l'asociación cultural.

Esta actividá mensual d'Ástura que nesta ocasión protagoniza Cerra, maestra miembru del RIDEA y llicenciada en Filoloxía pola Universidá d'Uviéu y n'Antropoloxía Social y Cultural pola UNED, va tener llugar esta tarde, a les 19.30 hores, nel Atenéu Obreru de Xixón con entrada llibre.