La Casa Posafuelles presenta’l llabor de los poetes asturianos

Güei martes 31 de xineru preséntase nel chigre "La casa posafuelles" que tien la Xunta Pola Defensa de la Llingua Asturiana n'Uviéu la obra de dos poetes mozos asturianos qu'asoleyaron apocayá los sos primeros versos. "Asturiana beat" de Pablo X. Suárez y "Nortiando" d'Hector Blanco, van ser les dos obres que van presentase colos comentarios de la doctora en Filoloxía Hispánica Pilar Fernández a partir de les 20:30h nel local de la cai La Cuesta la Vega de la capital asturiana.


Hector Blanco (Uviéu 1979) ye llicenciáu en Filoloxía Inglesa y responsable nel so día de la revista lliteraria Entellunu, ya desapaecida. Tien collaborao en bien de revistes lliteraries y medios de comunicación como Reloj de Arena o lletres Asturianes. No tocante a Pablo X. Suárez (Samartín d'Anes, Siero 1981) ye llicenciáu en Filoloxía Hispánica, dedicándose a la escritura dempués d'una estancia que fexo n'Alemaña d'ún añu n'acabando la carrera.