La baxada de tipos del BCE emburria l´Ibex penriba los 6.700

Perbona selmana pa los mercaos bursátiles na que los inversores cumplieron el suañu de la baxada de tipos d´interés fecha pol Bancu Central Européu (BCE). Agora'l preciu de les perres na Zona Euru asítiase nel 2%, una baxada de mediu puntu. El bon datu de desempléu d´Estaos Xuníos remató una selmana de xubes xeneralizaes en que l'Ibex pieslló'l vienres en 6.717,70 puntos, un +3,2% nel resume de la selmana y un 1,9% solo el vienres, entamando la bolsa madrilana un nuevu rally de xubes mentantu l´euru tiense en 1,17 dólares.



Les places del Vieyu Continente algamaron resultaos positivos la selmana pasada, anque al pieslle los inversores europeos recoyeron parte de la ganancia de les últimes selmanes, colo que les xubes foron menores que nos mercaos norteamericanos pero xeneralizaes, rescamplando'l DAX alemán, qu'espoxigó cerca del 5%.



En Wall Street entamó una pequeña llocura compradora énte l´anuncia del líder d´aplicaciones informátiques Oracle de querer mercar la tecnolóxica Peoplesoft, pola qu'ufierta 5.100 milllones de dólares. El xueves pasáu tamién el sector tecnolóxicu caltuvo la so influyencia sobre los mercaos neoyorquinos cola anuncia d´Intel de bones perspectives de ventes. L´índiz tecnolóxicu Nasdaq pieslló la selmana pasada en positivo mangándose nos 1.627,42 con una xuba del 1,97%, anque meyor resultáu tuvo'l Dow Jones, que tuvo una xuba selmanal penriba´l 2% p´asistiase nos 9.062,79 puntos.



Nuevu másimu anual nel parqué madrilanu al asistiase l´Ibex penriba los 6.700 puntos. El volume de negociu algamó'l vienres los 1.482 millones d´euros. Perimportante cayía p´Altadis, con perda selmanal del 14% pola mala acoyida de la compra de la compañía marroquí de tabacos RTM. Los valores estrella foron FENOSA, Sogecable, Iberia y Corporación Financiera Alba. Esta dio anuncia d´una OPA sobre ella mesma pa salir del mercáu, nueva amuesa de que de va añu y mediu p'acá les OPEs d´esclusión son norma pol mal andar de los mercaos financieros y de que parez que yá nun ye tan rentable pa delles compañíes cotizar en mercáu bursátil.


Otramiente, xuba espectacular d´Iberia, que medró un 17%, en parte poles bones perspectives del sector turísticu y pol supuestu control del SARS (neumonía atípico). L´entamu de les negociaciones ente los Estaos Xuníos y la Xunión Europea pa la regulación d´un espaciu aéreu abiertu foi tamién una noticia que-yos prestó abondo a los inversores. Otra de les xubes ablucantes de la selmana foi la de Sogecable, con un pieslle en positivo del 16%. Esta xuba vieno emburriada pola adxudicación a Sogecable de los drechos de tresmisión de la Lliga de Campeones, que mangaron l´aición nos 14,30 euros. BBVA y SCH tuvieron xubes penriba´l 3% p´asistiase nos 8,75 y 7,19 euros respectivamente. Otramiente, l´aición de Telefónica yá cotiza penriba los 10 euros mentantu sigue l'enfadu de los accionistes pol robu que ye la OPA d´esclusión de Terra. Respective a Terra dellos analistes falen de que va quedar en cenciellu departamentu de conteníos. Nel lláu de les perdes destaquen les fusionaes Sacyr-Vallehermoso, Abertis, Dragados, ACS y Acciona. En resume, l´índiz xeneral de la Bolsa de Madrid pieslló nos 701,71 lo que supón medrar un 1,77%, mentantu l´Ibex-35 trancó en 6.717,70 puntos y l´índiz Nuevu Mercáu asistiose nos 1.877,4 puntos.

L´euru perdió esta selmana énte'l dólar, emburriáu pol bon resultáu del paru nos Estaos Xuníos. La moneda europea pieslló en 1,17 dólares mentantu la norteamericana tuvo la segunda xuba en nueve selmanes.El preciu de barril Brent medró un 0,5% pa mangase nos 27,6 dólares, lo que supón la sesta selmana de xubes. L´oru prieto caltién entovia un preciu altu por culpa del petróleu iraquino, que nun ye a salír del país árabe. Les perspectives son que pal veranu'l preciu s´estabilice sobre los 24 dólares-barril. Otramiente l´oru cayó'l 1,5% colo que val 363 dólares la onza. Nel terrén de la renta fixo los bonos siguen xubiendo al entamar yá la sétima selmana de pieslles positivos. Ensin dulda los inversores nun s'enfoten nunos mercaos bursátiles mui febles y atechen les perres na renta fixo, nel mercáu inmobiliariu y n'inversiones alternatives. De toles maneres estes xubes tan apreciaes tienen de venir acompañaes d´axustes técnicos. Por ello nos prósimos díis los mercaos van sofrir dalguna cayida perimportante.