La Bandina estrena la temporada de conciertos n'El Sabil

A naide se-y escapa que yá llegó y la primavera, y que con
ella entamen a surdir les fiestes y conciertos per toa Asturies. Ente esos
conciertos y fiestes yá son un clásicu les qu'entama l'Hotel El
Sabil, qu'echa andar esti sábadu'l so programa de conciertos con La
Bandina.



Anguaño, como n'años anteriores,
El Sabil, que ta asitiáu nel
conceyu de Santu Adrianu, quier ufiertar una amuesa de música y
músicos de sabores diferentes, pa que se pueda tastiar los diferentes
proyectos y realidaes qu'hai n'actualidá na música asturiana. Un
bon exemplu nel folk ye por poner un casu'l grupu que fai al estrena de la
temporada de conciertos, La Bandina. Los responsables de
"de
romandela" van tocar esti sábadu día 1 a partir 23:30
hores nel propiu hotel, pa dar pasu depués a una xuntanza de
músicos que de xuru va espurrir la nueche hasta que dexe de selo.



Esti de La Bandina nun ye namás que'l primer conciertu de los más
de cien que quier entamar El Sabil pa la primavera y el branu. Por exemplu'l
próximu 22 d'abril yá ta preparáu un conciertu
d'Ígor Medio y
Lisardo Prieto colos daneses Faerd, pero van ser munchos más los
grupos que se van poder ver nesti conceyu del centru d'Asturies, grupos de
palos tan diferentes como MK 11, Delagua, Toli Morilla, Xulio Ramos, Rebeca
Velasco Quarted, La Curuxa, Verdasca...y un llargu etc.