La bandera llució na fachada de Presidencia pol 25 de mayu

|
Bandera en Presidencia pol 25 de mayu

El Gobiernu arrancaba asina los actos institucionales conmemorativos de los fechos del 1808, orixe del nuesu emblema.

Anueche proyeutóse la bandera d'Asturies na fachada del Palaciu de Presidencia. Foi con motivu del 25 de mayu que, per primer vegada, va ser recordáu poles instituciones.

Hasta'l momentu namái un sector de la sociedá civil conmemoraba esta fecha clave na historia d'Asturies, iniciu de la dómina contemporánea, cuando'l pueblu asturianu se declaró soberanu al traviés de la Xunta Xeneral, llevantándose n'armes contra los franceses, organizando l'Exércitu Defensivu Asturianu y unviando embaxadores a Inglaterra. Ye tamién nesti momentu cuando se crea la bandera a partir d’una propuesta de diseñu de Gaspar Melchor de Xovellanos fecha décades atrás.

"Una rebelión cívica de les nueses instituciones y el nuesu pueblu pa defender la Llibertá", apuntó ayeri Adrián Barbón. "L'añu pasáu adquirimos un compromisu colos grupos memorialistes que nos pedíen a les instituciones que conmemoráramos el 25 de mayu, pola so importancia histórica. Mañana –por güei– va ser el primer actu institucional entamáu de manera conxunta pol Gobiernu del Principáu d'Asturies, la Xunta Xeneral y el Conceyu d'Uviéu. Un actu modestu, cenciellu, pero cargáu d'emotividá", garantiza'l presidente sobre l'eventu programáu pa esti meudía nel Palaciu del Conde de Toreno.

 

Contador Estadistiques