L’occidente rexistra una muerte importante de xibies que los espertos venceyen a un vertíu al Cantábricu

Los responsables del Muséu del Calamar Xigante, de Ḷḷuarca, alertaron esti martes d’una catástrofe ecolóxica que ta viviendo l’occidente del país. Dellos puntos de la costa tán rexistrando una muerte importante de xibies.
 
Los espertos d’esti equipamientu venceyen esti fechu a un vertíu a les agües del Cantábricu que ta poniendo en peligru inclusive les poblaciones algaries de la costa occidental asturiana y oriental gallega. Tampoco nun descarten que dalgún tóxicu pueda exercer un dañu indireutu a les poblaciones d’algues y, más direutu, a dalgunas especies que supediten la so reproducción nelles, como ye’l casu de les xibies. El llunes foi’l primer día en que se percibió la muerte masiva d’esti cefálopodu de gran valor gastronómicu, con una incidencia especial nes sableres de Pormenande (El Franco) y Penarronda, ente los conceyos de Castropol y Tapia.
 
Los exemplares atopaos muertos polos profesionales del muséu teníen un peso superior a los dos quilos y taben n’estáu de descomposición. Aseguren que se trata d’una situación "única na costa asturianu" que sorprende inclusive a les persones mayores del llugar. Estos espertos descarten hipótesis como la muerte por esgüeve, yá qu’esta fase de reproducción de la xibia nun se suel dar hasta’l mes de mayu. Amás, la temperatura del agua na actualidá imposibilita l’esgüeve adelantáu al igual que l’alteración de la salinidá del agua pola influencia del aumentu del caudal de los ríos poles lluvies.