L’Avilés da un pasu de xigante tres ganar 2-0 al Llagostera

La fase d’ascensu a Segunda División A traxo noticies positives pal fútbol asturianu. El Real Avilés derrotó 2-0 al Llagostera y da un pasu de xigante hacia la ronda definitiva. Nel play-off pa xubir a Segunda B, l’UP Langreo y l’UC Ceares firmaron derrotes.

 

Una actuación xenial nueva d’Álex Arias y la solidez de tol equipu –el Llagostera tuvo una ocasión única de gol en tol partíu– llevó la folixa a les graes del Suárez Puerta, que vivieron una entrada meyor qu’ante’l Cartagena. El futbolista avilesinu marcó’l primer tantu tres una xugada de tirallinies de los blanquiazules, mentes que Dani López, tres un taconazu del propiu Arias, punxo’l 2-0 nel marcadar de fuerte disparu.

 

Pese a que, a priori, la ventaya paez suficiente pa que l’Avilés xuegue la ronda definitiva pol ascensu a la división de plata, lo cierto ye que los d’Uribe nun pueden confiase énte’l partíu de vuelta. El Llagostera trátase del campeón del grupu 3 de Segunda B, pa munchos el más complicáu de los cuatro, y el so campu ye una de la baces de los catalanes, que namái encaxaron una derrota como llocales en tola temporada. El Municipal de Llagostera, de prau artificial, tien unes dimensiones de 95x60, polos 105x65 del Suárez Puerta, y el Racing yá lo sufrió na eliminatoria de campeones de grupu, onde nun pudo pasar del empate a cero goles. El choque de vuelta ta previstu pal domingu a les 19 hores.

 

El Llangréu, a remontar en Ganzábal

 

L’infortuniu nes fases d’ascensu a Segunda División B del Llangréu tornó a apaecer n’Haro, onde los azulgranes perdieron por 1-0 (minutu 76) tres un bona aición individual de Breixo tres recibir un balón nel área. Un penalti, que foi al palu tres tocar el porteru, y delles ocasiones nidies nun foron suficientes p’anotar fuera de casa y los de Pablo Lago van tener que solucionar la papeleta en Ganzábal. L’apoyu de l’afición, que yá dexó muestres del sofitu al equipu n’El Mazo, con más de doscientes persones desplazaes a La Rioja, va ser fundamental nesti choque previsto pal domingu a les 18 hores. Les entraes yá tán a la venta al preciu de 5 euros pa socios y sub-25,  y de 12 p’adultos. Los menores de 17 entren de baldre.

 

Tampoco nun tuvo suerte’l Ciares, que se complica muncho’l pase a la ronda definitiva tres perder 0-3 col Trival Valderas. Pese a la superioridá amosada pol equipu alcorconero, una espulsión con collorada direuta a Jimmy más que rigurosa nel minutu 41 –con marcador de 0-2 polos tantos d’Óscar y Herrero– impidió a los de Nacho Cabo competir de tu a tu col Trival na segunda metá, onde’l campeón de la Tercera madrilana marcó un tercer tantu por mediación d’Óscar que paez definitivu. Sicasí, l’afición ciarista nun baxa los brazos y ta entamando un desplazamientu importante a Alcorcón pa esta fin de selmana: un autocar saldrá de Xixón a les 13 del sábadu y otru a les 4 hores del domingu, siendo’l preciu del viaxe de 25 euros. El partíu ta puestu pa les 11.30 hores y la entrada pa los socios ciaristes ye de 5 euros tres el conveniu robláu col Trival.