L’Atenéu N’Alfoz entama una charra sobre’l presente y el futuru del idioma

|

Ciudadanos d’Avilés, Castrillón, Corvera y Illas tán acabantes de poner en marcha una entidá cívica centrada en cuestiones culturales y llingüísticas, l’Atenéu N’Alfoz. Esti xueves entamen una charra sobre’l presente y el futuru del asturianu.

Estes persones, procedentes del asturianismu social, vienen trabayando dende hai meses pa dar forma a esti proyeutu que yá ye una realidá. El so enfotu ye promover llugares d'alcuentru ente los asturianistes d’estos cuatro conceyos; promover y esparder la llingua y cultura asturiana, reivindicando la normalización y oficialidá del asturianu; y acercar l'ideariu del asturianismu a la sociedá. Pa ello, l’Atenéu N’Alfoz va entamar actos y actividaes culturales, campañes de promoción de la nuesa cultura y ellaboración de materiales. “Consideramos importante crear llugares d'alcuentru ente ciudadanes y ciudadanos y entidaes yá existentes”, espliquen dende l’entidá cívica. La so primer actividá tuvo llugar el 8 de marzu y consistió nun alderique sobre’l movimientu de reivindicación llingüística na década de los 80.

Esta tarde, l’Atenéu N’Alfoz entama una charra de nome ‘Llingua asturiana güei. Perspectives de presente y futuru’, col oxetivu d’analizar la situación actual del idioma y buscar respuestes coleutives dende los conceyos de la zona de d’Avilés. Nella van participar Carlos Pulgar, voceru de la Xunta pola Defensa de la Llingua Asturiana; Vítor Suárez, vicepresidente d’Iniciativa pol Asturianu; Félix Fernández, de Reciella-Families pol Asturianu; y Adolfo Camilo Díaz, escritor, xestor cultural y miembru de l’Academia de la Llingua Asturiana, amás d’un representante de l’Asamblea de Docentes de Llingua Asturiana y Gallego-asturiano. L’actu va tener llugar a les 20 hores, n’El Cafetón, chigre asitiáu na cai El Sol, d’Avilés.

 

AdxuntuTamañu
Image icon Atenéu N'Alfoz.jpg0 bytes
Contador Estadistiques