L’asturianu va tar presente nel XXIV Congresu de Llingües y Cultures Europees Amenazaes

Inaciu Galán va dar una conferencia nesta cita entamada por ALCEM, entidá de la que ye presidente Roberto González-Quevedo, que va celebrase del xueves al sábadu n’Uesca.

L’Asocciation pour les Langues et Cultures Européennes Menacé (ALCEM) organiza’l XXIV Congresu de Llingües y Cultures Europees Amenazaes en collaboración col Consello d'a Fabla Aragonesa col oxetivu de “llamar l'atención sobre les llingües amenazaes, tanto énte la sociedá como énte les autoridaes competentes; dar a conocer la situación pola que pasen delles llingües amenazaes d'Europa; estrechar los venceyos ente los representantes, falantes y estudiosos de distintes llingües minoritaries europees; deprender de les aiciones implementaes n'otres llingües; trabayar a comuña pola reconocencia, la dignificación y la promoción de les llingües amenazaes, tratando d'evitar la so desapaición y procurando el so mayor usu y la so mayor conocencia; y, por supuesto, aprovechar pa reivindicar aiciones positives de política llingüística pa toles llingües amenazaes”. Al celebrase n’Uesca, l’aragonés tendrá un espaciu destacáu.

La llingua sarda, la vasca o’l gaélicu escocés son dalgunes de los idiomes con presencia nel congresu, onde tamién va tar presente l’asturianu. El presidente d’Iniciativa pol Asturianu, Inaciu Galán, va dar la conferencia ‘Asturianu SOS: una güeyada sobre la situación de la llingua asturiana y les sos perspectives de futuru’, na que va tratar de la situación de peligru que vive l'asturianu y la falta d'un estatus llegal afayadizu, que tendría solución cola reforma del Estatutu d'Autonomía y la inclusión de la oficialidá de la llingua asturiana”.

La representación asturiana va completase con González-Quevedo, tamién secretariu de l’Academia de la Llingua Asturiana, que va dar una conferencia. D’igual forma, va haber un espaciu pal llibru asturianu nel ‘Escaparate de Llingües Amenazaes’.