L’anunciu de la manifestación pola oficialidá del vienres va emitise cinco veces na TPA

4 Mayu, 2011 por Pablo R. Guardado

Inicie sesión o rexístrese pa espublizar comentarios

La Xunta pola Defensa de la Llingua Asturiana va sacar na televisión pública’l so anunciu pa movilizar a la ciudadanía de cara a la manifestación pol Día de les Lletres Asturianes. Tamién va emitir 16 cuñes na RPA.

L’anunciu, nel que participa la actriz María Cotiello, la presentadora Esther Fonseca y el músicu Xosé Antón ‘Ambás’, va emitise per primer vez güei a les 13.55 hores, poco enantes del entamu del informativu de la TPA. Pela tarde va volver a les pantalles alredor de les 19 hores. Esti mesmu horariu va repetise mañana, mentes que’l vienres namái va mantener l’horariu de les 13.55 hores.

La promoción de la manifestación ‘L’asturianu, llingua oficial. Da-y al play. Movilízate’, que va salir a les 19.30 hores del vienres de la Estación del Norte d’Uviéu, tamién va poder sentise na radio. Tán previstes la emisión d’un total de 16 cuñes nos trés díes próximos: cuatro güei, ocho mañana y cuatro’l vienres. L’anunciu va consistir nel audiu del vidiu que ta colgáu en Youtube dende’l llunes.