L’Anguleru trai la Navidá a los escolinos del colexu de Panes

L’Anguleru, responsable de llevar los regalos a les neñes y neños asturianos en Nuechebona, va protagonizar el Festival de Navidá del xueves nel colexu de Panes. Profesores y pas van representar una obra de títeres sobre esti personaxe.

Natural d’Asturies, anque residente n’América, nel mar de los Sargazos, onde cuida de les anguiles y les angules, L’Anguleru viaxa nestes feches al so país na so llancha pa pescar angula en Nuechebona, vendela, y coles perres que saque, mercar regalos a tolos neños y neñes asturianos, qu’entrega esa mesma nueche. L’Anguleru vien en Navidá porque ye época d’angula y entra n’Asturies pel ríu Nalón, onde los guaḥes de L’Arena salen a recibilu. Darréu, esti personaxe percuerre tolos llugares d’Asturies onde hai agua en busca d’angula. Si los reis de la casa dexen un gorru de llana en Nuechebona baxo l’árbol de Navidá y dalgo de comer y beber pa que pueda reponer fuercies, a la mañana siguiente van atopar los sos regalos nesi mesmu llugar.

Esta tradición tán guapa, impulsada dende hai pocu tiempu pola Asociación Cultural Garabuxada de L’Arena, ta siendo utilizada polos responsables del Colexu Públicu Xovellanos de Panes como proyeutu de trabayu y dinamizador educativu. Asina, tolos neños y neñes del centru, dende Infantil 2º de la ESO, participaron na decoración navidiega de la escuela y en delles actividaes centraes na figura del pescador que viste de mariellu y que lleva na so mano un farol máxicu. L’Anguleru supón tamién una figura motivadora pal aprendizaxe de la Llingua Asturiana y permite la incoporación de los pás y de les mas nes actividaes desendolcaes. Los maestros d’Eduación Infantil Víctor Raúl Pintado Rey ‘Vitu’ y Aida Jaquete Díaz destacan “l’ésitu” de la iniciativa, que mañana vive’l so día grande cola celebración del Festival de Navidá, nel que destaca la representación de la obra de títeres ‘Les aventures de Papa Noel y L'Anguleru’ y la visita del personaxe.