José Luis Pérez lleva a un llibru los molinos d’agua de Xixón

L'estudiosu y presidente de l'Asociación de Vecinos de la parroquia xixonesa de Santurio José Luis Pérez, presentó ayeri la so obra sobre los molinos d'agua del conceyu de Xixón, que se presentó ayeri públicamente nel molín de Rionda, ún de los qu'entovía queden en conceyu. Con testos en castellanu y semeyes del fotógrafu Arnaud Späni, la obra edítenla'l Conceyu de Xixón y la Empresa Municipal d'Agües (EMA) que celebra los sos 40 años.

Nel so trabayu d'investigación l'autor alcontró qu'a mediaos del sieglu XX entovía daben serviciu en Xixón 50 molinos d'agua tradicionales de los qu'entovía queden 32 en pie, anque namás cuatros d'ellos tan en condiciones de funcionar. Valdornón y Cabueñes son les parroquies onde sobreviven más molinos, con cinco caúna, mientres que Bernueces, Caldones, Ciares, Cenero, Deva, Granda, Güerces, La Pedrera, Llavandera, Lleorio y Ruedes tienen los demás que queden.

El molín de Rionda en Cabueñes, inxertu nel Xardín Botánicu de la ciudá, el de La Quinta en Caldones, y Xilleo en Granda son los trés meyor calteníos. L'autor de la obra diz que ye posible recuperar dellos d'estos molinos pa facer nellos actividaes y como motores de l'actividá económica venceyaos al turismu.