Jesús Iglesias ve "imposible" llegar a un alcuerdu sobre los presupuestos

El portavoz de IX-BA-LV, Jesús Iglesias, declaró ayeri que vía "imposible" el llegar a un alcuerdu col Gobiernu en materia presupuestaria d'equí al 2 de payares, fecha acutada como tope pol Executivu. Según Iglesias yá nun hai marxe de tiempu pa negociar unes cuentes de les qu'asegura, contra la versión del executivu, que nun recibió'l documentu base coles partíes económiques, que precisaría díes d'estudiu.

Iglesias echó-y en cara al presidente Vicente Álvarez Areces, que nun-yos unviare la documentación que pidieren pa valorar el presupuestu y calificó de "incumplimientu", por parte d'Areces del compromisu que fexere nel Debate d'Orientación Política de facer una negociación previa sobre la cuestión. Iglesias calificó tamién de "poco seriu" l'ofrecimientu de la portavoz del Gobiernu Ana Rosa Migoya pa facer una reunión "con númberos" porque aseguró que-yos llegó "al traviés de la prensa". El responsable d'IX aseguró que nos papeles que recibieren hasta agora nun diz nada sobre les inversiones anunciaes pol Gobiernu central nin otres partíes anunciaes en prensa pol mesmu Areces, casu de los 18 millones d'euros que tendría'l salariu social, entesacando de los datos que tien Jesús Iglesias que'l gobiernu asturianu "asítiase nun escenariu de prórroga presupuestaria".

Los alcaldes colos que cuenta IX-BA-LV asistieron tamién a la rueda de prensa, na que Iglesias criticó que'l Gobiernu-yos anunciare, ensin concretales "inversiones en conceyos gobernaos por IX, dalgo que calificó de "cacicada".