Jesús Iglesias promete un Plan Estratéxicu Cultural p’Asturies

El candidatu d'IX-BA-Verdes a la Presidencia d'Asturies, Jesús Iglesias, declaró ayeri n'Avilés que'l modelu cultural de los socialistes n'Asturies túvose nestos cuatro años últimos na "propaganda y los fastos efímeros", una política contra la que propunxo facer de la cultura "motor económicu y refuerzu identitariu qu'ayude a facer país" al traviés d'un plan estratéxicu cultural qu'afonde nel reconocimientu d'una cultura "plural y diversa".


El Plan implicaría facer un "mapa cultural" y apautaría les polítiques conxuntes que tendríen de llevase alantre optimizando tolos recursos culturales que s'alcuentren "dispersos" potenciando'l llabor de los creadores artísticos, fomentando la participación activa de la ciudadanía y llevando alantre un Plan Integral del Patrimoniu etnográficu, industrial y arqueolóxicu, xunto con un Plan d'Intervención Cultural nos caminos de Compostela.

En política museística, la propuesta d'Iglesias pasa per da-y una "solución definitiva" al Arqueolóxicu, convertiéndolu en cabecera de la rede y coordinador de los parques arqueolóxicos asturianos. Una rede pública de conservatorios de grau elemental y mediu forma parte tamién de la propuesta d'IX.