Jesús Iglesias enfótase en caltener el pautu de gobiernu hasta’l final de la llexislatura

El coordinador xeneral d'Izquierda Xunida reconoció ayeri la existencia de problemes nel pautu de gobiernu col PSOE pero enfotóse en llegar a fnal de llexislatura sacando alantre los compromisos políticos firmaos ente les dos organizaciones. Ello ye qu'ayeri IX-BA y FSA-PSOE francieron, por segunda ocasión en tola llexislatura, la disciplina d'unidá de votu na Xunta xeneral del Principáu, onde los socialistes refugaron la iniciativa d'IX qu'esixía al gobiernu que-y devolviera a la canal de TV TeleAsturias la señal de repetidor a travies de Retevisión. La iniciativa d'IX salió aprobada colos votos del PP.

Noemí Martín defendió la propuesta d'IX. La diputada afirmó que'l so grupu nun pretendía facer un debate xurídicu sobre la televisión dixital terrestre, sinón plantear un "debate políticu rellacionáu colos valores y principios democráticos" calificando la decisión de cortá-y la señal a Teleasturias "a trés meses d'unes eleciones" como "de tal gravedá política y democrática que requier una rectificación inmedita". El representante popular afitóse nes mesmes idees, calificando'l corte de señal a la emisora de "ataque a la llibertá d'espresión y al pluralismu políticu", mientres que'l socialista Benjamín Gutiérrez acusó al PP de facer de "paladín d'una empresa" y afitóse na validez del concursu de repartu de llicencies d'emisión.