Jesús Iglesias comprometióse a defender la oficialidá del asturianu énte l’Academia de la Llingua

El Coordinador d'Izquierda Xunida Jesús Iglesias y la presidenta de l'Academia de la Llingua Asturiana Ana Cano tuvieron esti llunes una entrevista na que trataron la cuestión de la reforma del estatutu d'autonomía "La declaración de la oficialidá nel Estatutu d'autonomía ye la última gran oportunidá pa garantizar al asturianu la so supervivencia" declaró Jesús Iglesias, nuna reunión na qu'Izquierda Xunida-Bloque Por Asturies-Los Verdes comprometióse a defender la declaración d'oficialidá de la llingua asturiana na próxima reforma del estatutu d'autonomía.

"Ensin oficialidá", dixo Iglesias, "nun hai garantíes reales de supervivencia d'esta llingua pal futuru, anque llueu se diga que se defiende l'asturianu". "Naguamos", añadió, "por que les próximes selmanes, nes que va empezase a ellaborar el nuevu estauttu, seya la espresión d'esta llucha".

Pela so parte, Ana Cano, afirmó que "nun s'entiende la reforma del estatutu ensin la inclusión de la declaración d'oficialidá". Al so xuiciu, "nun se pue dicir que se ta a favor del asturianu y de la protección de la llingua, y llueu nun tar d'alcuerdu cola oficialidá". La reconocencia de la 'llingua' como oficial "nun ye nenguna imposición d'obligatoriedá pa la xente que quiera falala", sinón, "la garantía de que la xente que lo quiera pueda utilizala". "Los argumentos de que tal midida pueda conllevar el surdimientu d'un nacionalismu escluyente son disculpes absurdes", concluyó.

El conceyu ente dambos ta dientro de la serie d'alcuentros que Cano caltién periódicamente con representantes de partíos políticos con representación parlamentaria, ensin representación y organizaciones sociales y sindicales.