Jesús Iglesias pide que'l Gobiernu faiga una investigación interna sobre'l llibru "Construyendo Asturies"

El coordinador d'Izquierda Xunida d'Asturies, Jesús Iglesias pidió esta mañana que'l Gobiernu asturianu investigue si daquién de la so redolada pudiere tener rellación cola publicación "Construyendo Asturies", la obra anónima de propaganda qu'anuncia les obres y proyectos del executivu asturianu.

Izquierda Xunida pide que se faiga una investigación nel sén de Gobiernu primero de facela nel marcu de la Xunta Xeneral, como pidiera'l Partíu Popular y llegare a pidir tamién el conseyeru Javier Valledor, calificando Iglesias de "Saltu nel vaciu" l'entamar una investigación parlamentaria primero de facer una gubernamental. Pa Iglesias "el Gobiernu asturianu nun pue despachar con una nota de prensa la distribución d'esti llibru de vocación propagandística". El Coordinador xeneral d'IX camienta que pol conteníu propagandísticu de la obra pue deducise que probablemente dalguién rellacionáu con eses alministraciones o fuerces polítiques tuviere ciertu grau de participación". Xunto con esto, Iglesias declaróse partidariu de que se constituya la comisión de control que ta prevista na llei de publicidá institucional.