Jesús Iglesias cree “imprescindible” la tresparencia na Alministración

El candidatu d’Izquierda Xunida-Los Verdes d’Asturies (IX-LV) señaló güei que ye “imprescindible” aumentar los graos de les incompatibilidaes pa funcionarios y cargos públicos, publicitar tolos contratos que suscriban les alministraciones publiques y dotales de controles que garanticen la tresparencia y “dignifiquen la política”. Foi nuna rueda de prensa na qu’analizó les propuestes feches públiques de manera reciente pol PSOE, PP y Foro Asturias Ciudadano (FAC).

Nesi sen, Iglesias destacó’l fechu de que’l PSOE asumiera les propuestes de tresparencia y control de l’Administración feches pola coalición “hai dos meses”, según afirmó’l cabezaleru de la llista a la Xunta Xeneral. Con respeuto a Francisco Álvarez-Cascos, el llider d’IX calificó de “disparate” la propuesta del númberu ún del FAC pa que “la inversión pública sumada a inversión privada remate les infraestructures grandes aínda ensin concluyir n’Asturies”. Iglesias considera que pa ello necesitaríanse “creitos multimillonarios facilitaos pola banca a les empresas constructores, dalgo más qu’improbable na actualidá”.
 
El cabezaleru de la llista d’IX-LV tamién criticó les propuestes de privatización de la enseñanza o’l sofitu a los colexos del Opus Dei que Cascos y Isabel Pérez-Espinosa, candidata del PP a la presidencia, planteguen de forma respeutiva”. D’igual forma, tamién fixo refencia al arzobispu d’Uviéu, Jesús Sánz Montes, por entrometese na campaña “pidiendo’l votu pa les dereches” en llugar d’apoyar polítiques “como’l Salariu Social”. Pa terminar, Iglesias apuntó la necesidad de “controlar la inversión y xestión del capital públicu presente n’empreses privaes pa que nun tornen a repetise Diasas, Venturos XXI o Alas Aluminiuns”.