Javier Maqua destacó la importancia del asturianu como elementu diferenciador

La Fundación Caveda y Nava, nacida na idea de favorecer un consensu mínimu a favor de la llingua asturiana, celebró esti sábadu la so tradicional xornada añal, qu'incluyó l'ingresu na institución como patronu d'honor del director de cine Javier Maqua.

L'actu celebróse en Monesteriu de Valdediós, entamando con unes palabres d'agradecimientu d'Ignaciu Iglesias en nome de la fundación al públicu asistente, nel que s'alcontraben descendientes de Xosé Caveda y Nava, escritor en llingua asturiana que da nome a la fundación. Ramon d'Andres, pela so parte, presentó la páxina web de la fundación, allugada nel dominiu www.fundacioncavedaynava.org. acompañau de Policarpo Mencia, responsable de la mesma.

Tres d'estos prolegómenos, Jose Uría fexo la presentación de Maqua, al que definió como "home con capacida de vision de diferentes realidaes" y del qu'agradeció l'usu del asturianu en toles sos obres rellacionaes con Asturies, ente les que rescampla la película "Carne de gallina". Al rau d'ello, Uría fexo dellos comentarios sobre la situación de la llingua asturiana. Nesti sentíu, llamentó que mientres l'asturianismu culpabiliza de la decadencia del idioma a los politicos, el verdaderu problema, al so paecer, pa la sobrevivencia del idioma, parte de la concepcion que los mesmos falantes faen de la llingua y de la perda de tresmision xeneracional. Pa Uría, n'Asturies "nun valen les creaciones llinguistiques coles que se normalizaron idiomes n'otros llugares d'Europa", en cuantes que la realidá asturiana parte "de la existencia del amestáu" y polo tanto nun puen "usase palabres rares" nin "usar un idioma esotéricu y ritual" que, al so paecer, "crea distanciamientu". Xusto al revés de lo que fai "Carne de gallina" qu'Uría definió como propuesta d'un asturianu que podría ser meyorable pero que ye real y que "nun crea distanciamientu".

L'homenaxeáu del día, Javier Maqua, fexo pela so parte un discursu basáu na importancia que pa elli, que nun ye asturianu de nacimientu, tenía l'asturianu en cuantes que llingua rellacionada coles sos alcordances de mocedá y como cuestión pola que tenía especial afectu personal. Pasando a un planu menos personal, el realizador de cine destacó la importancia del asturianu como "diferencia qu'enriquez" pa que lo local nun acabe metío nel "magma de lo global" y esplicó, n'alusión a la presentación d'Uría, que con "Carne de gallina" quixo facer "un trabayu que fuera realista", denunciando como "el cine español prefier el castellanu neutru y nun permite ni l'acentu como si l'orixe que denota l'acentu fuere cosa de vergoña".

Inaciu Iglesias peslló l'actu en Valdediós falando del importante momentu que se se vive cola inminente reforma del estatutu, na que ta en xuegu la definición del estatus plíticu del asturianu, que comparó con otru llogru históricu como foi el llogru del derechu de la muyer al votu. La xornada acabó cola llectura en Villaviciosa, énte la casa del poeta, de testos en castellanu y asturianu.