Javier Fernández echa pela propuesta de reforma del estatutu d'IX

El secretariu xeneral de la Federación Socialista Asturiana (FSA) echó ayeri peles propuestes de reforma del estatutu d'autonomía asturianu que presentaren conxuntamente la selmana pasada Izquierda Xunida y Bloque por Asturies.

Nel trescursu d'una celebración local de los socialistes de Villaviciosa, Javier Fernández retomó dellos puntos del discursu que yá diere énte los socialistes avilesinos va pocos díes. Si entós Fernández dixo qu'Asturies "nun vive una esquizofrenia ente la identidá asturiana y la española" ayeri'l secretariu de los socialistes asturianos entamó a desmontar les propuestes más identitaries de la coalición d'izquierdes IX-BA, que presentare esti miércoles la so propuesta de reforma del estatutu. Asina, en cuantes a la reforma del mapa electoral asturianu y los cambeos de representatividá política na Xunta Xeneral, Fernández negó la posibilidá de qu'Asturies vaya facese una sola circunscripción electoral.

Reforciando'l discursu que yá diere énte los socialistes avilesinos va pocos díes y nel qu'afirmó que nun diba consentir "que se politice la identidá tan fuerte d'Asturies" refugando la posible denominación de nacionalidá histórica p'Asturies, Fernández atacó tamién la propuesta d'oficialidá del asturianu d'IX-BA alegando que "nengún grupu pue monopolizar la defensa del asturianu" y que la oficialidá nun ye precisa en cuantes que l'idioma "tien protección abonda".

Otramanera, el secretariu xeneral de los socialistes asturianos, que tuvo mui críticu cola actitú y llabor del PP, volvió a ufrir a los populares la posibilidá de sentase a negociar la reforma estatutaria, en cuantes que la so ausencia diba ser "incomprensible".