Javier Fernández asegura que la reforma del estatutu va facese ente tolos partíos de la Xunta Xeneral

La Federación Socialista Asturiana quier facer una reforma estatutaria en collaboración col PP, pero ello nun quier dicir que nun se vaya contar con IX. Asina aclarió'l secretariu de la FSA Fernández la situación de la reforma estatutaria dempués del espolín organizáu con IX dempués de que'l mesmu Fernández declarare la posibilidá de pautar la reforma col PP.

Pa Fernández el PP en cuantes que fuerza política de gran representación na Xunta Xeneral ha tener participación na reforma, siendo matemáticamente "imprescindible la so presencia, en cuantes que nel casu contrariu nun diba haber estatutu" pero ello tampoco ha vese como que se faiga de menos a IX en cuantes qu'amás nun pue falase de xerarquíes y que lo qu'hai na Xunta Xeneral son trés fuerces que tienen que redactar una ponencia y debatila, anque cola idea de que toes van tener que dexar delles pretensiones nel camín. Fernández esplicó que pa los socialistes la voluntá ye la de pautar con toos y tramitar el debate políticu na Xunta Xeneral, anque llamentó qu'ello nun va ser posible por causa de l'actitú del PP, al que-y pidió qu'esplicare la so actitú de "nun negociar la reforma asturiana cuando si lo fai en Valencia, Galicia y Castiella y Lleón".

El secretariu de la FSA dio estes esplicaciones na presentación de la campaña que va desarrollase esti mes de mayu per toa Asturies pa facer balance de dos años de gobiernu socialista n'España y los trés últimos de llexislatura n'Asturies.