Izquierda Xunida va pidir nel Senáu una partida pa l’ALLA nos Presupuestos Xenerales del Estáu

El senador Jesús Iglesias anunció esti miércoles que’l grupu políticu d’Izquierda Xunida na Cámara alta va pidir una partida pa l’ALLA nos Presupuestos Xenerales del Estáu. Tamién va entrugar polos incumplimientos en materia toponímica.

Nuna rueda de prensa tres un aconceyamientu con Iniciativa pol Asturianu, Iglesias comprometióse a presentar una enmienda pa que l’Academia de la Llingua Asturiana (ALLA) tenga un partida nos Presupuestos Xenerales del Estáu al igual que l’Institut d'Estudis Catalans (341.340 euros), la Real Academia Galega (341.340 euros) y la Euskaltzaindia (179.000 euros). Vítor Suárez, miembru d'Iniciativa, señaló que lo importante, más que la cantidá aportada, ye "abrir un camín" a la financiación del Estáu a l'ALLA, como asocede con otres academies, que per otru llau tamién cuenten con financiación autonómica. Esti añu'l Gobiernu comprometióse a aportar 168.000 euros a la institución asturiana.

El senador tamién va entrugar na Cámara alta polos "incumplimientos" en materia de toponimia tradicional reconocida observaos nes señalizaciones que correspuenden a l'Alministración estatal. La intención d’Iglesias ye plantegar la pregunta n'asturianu, aspeutu que va tener que negociar cola presidencia de la cámara, al nun ser ésta llingua oficial.

Otra de les propuestes qu'IX recoyó d'Iniciativa pol Asturianu ye referente a la partida que los presupuestos, nesti casu nacionales, destinen a la financiación de la Real Academia Española (RAE), y que xube nes cuentes del 2013 a 27.000 euros. Suárez recordó que la RAE ye l'academia de "un idioma que nun precisa proteición porque nun cuerre nengún peligru de desapaición", polo qu'al so entender sería xusto qu'esta cuantía se destinare a l'ALLA.

Per otra parte, la diputada Emilia Vázquez tamién recoyó la propuesta de promover un cursu d'asturianu na Xunta Xeneral destináu tanto a diputaos como a trabayadores del órgano cola fin de promover l'usu de la llingua nel ámbitu parllamentariu. Coles mesmes, va entrugar polos motivos polos que'l Gobiernu nun unvió la información solicitada pol Comité d'Espertos responsable del siguimientu sobre'l cumplimientu de la Carta Europea de Llingües Minoritaries, aprobada pol Conseyu d'Europa.

Na semeya, Suárez, Vázquez, Iglesias y Galán.