Izquierda Xunida acusa a la FSA de facer "comedia" col Estatutu d'Autonomía

El secretariu d'Organización d'Izquierda Xunida d'Asturies, Ángel González, acusó güei a la Federación Socialista Asturiana de facer "la comedia" sobre l'estatutu d'autonomía al augurar una negociación conflictiva basándose no ocurrío cola negociación de los presupuestos autonómicos. González realizó estes declaraciones en Pola Llaviana na mesma rueda prensa na que'l tamién coordinador d'Izquierda Xunida de Llaviana analizó dellos puntos municipales.

Respecto al estatutu, el secretariu d'Organización d'Izquierda Xunida d'Asturies recordó que la coalición, xunto col Bloque por Asturies, foi "la única fuercia que presentó una propuesta" hai dos años y que'l Partíu Popular negóse entós a constituyir aquella ponencia.

"Tal como vaticinamos al entamu de la llexislatura diba facese un poco de paripé", señaló'l mesmu, quien añadió que "difícilmente la ponencia d'estatutu va constituyise enantes de marzu o abril", anque consideró que les elecciones xenerales "nun entamu nun diben por qué afectar". "Ye curioso como n'otros sitios d'España la reforma de los estatutos fízose bien rápido, con pocos conceyos y con unos oxetivos claros", añadió'l dirixente d'Izquierda Xunida.

Así, Ángel González quiso matizar que si la reforma del estatutu nun avanza "ta claro que nun se-y pue echar culpa d'ello a IX nin entemecelo colos presupuestos de nenguna manera".

Amás, el representante d'Izquierda Xunida insistió en que la so organización tien les sos propuestes que va llevar a la negociación "y vamos ver si somos quién a consensualo".

"Si al final lo que se pretende ye un alcuerdu de mínimos col PP pa qu'haya un Estatutu y cubrir l'espediente y perder otra vez la oportunidá de tar a l'altura de cualquier otra comunidá d'España; Asturies nun tien por qué ser menos que nenguna otra, naide pue defender qu'Asturies seya históricamente menos importante que Cataluña o'l País Vascu", declaró.

No que cinca a los presupuestos, Ángel González manifestó que, na so opinión, les declaraciones de Javier Fernández dexen "n'evidencia que nun había nengún interés en llegar a alcuerdu".
"Partíase de la base de que nun diba haber alcuerdu, entós había de montar un teatru y unos decidieron que'l teatru yera meyor facelu col máximu rendimientu publicitariu, vamos decir preelectoral", declaró'l secretariu d'Organización d'IX d'Asturies, quien reprochó que los socialistes sólo-yos van presentar un llistáu de proyectos ensin cuantía económica. "Esto ye inauditu, porque enantes se mos presentaben númberos", concluyó.