Izquierda Asturiana va celebrar el 8 de setiembre en Xixón

Dempués de que PAS y URAS anunciaren la otra selmana la celebración d'un Día d'Asturies conxuntu n'Uviéu con un homenaxe a los monarques asturianos como actu central de la xornada, Izquierda Asturiana (IAS) ye la siguiente fuerza en dar anuncia del so programa pal 8 de setiembre.

Ignaciu Llope, portavoz de la Dirección Nacional d'IAS afirmó qu'Izquierda Asturiana va intentar afitar esi día como un día de reivindicación nacional asturiana en nel qu'anguaño, y con vistes a a la reforma del estatutu, se sorraye la necesidá de reclamar que'l testu espeye la condición d'Asturies como nación y la oficialidá inaplazable, ensin compnendes nin retrasos, de la llingua asturiana."

IAS va celebrar esti 8 de setiembre con una concentración na Plaza'l Parchís de Xixón n'homenaxe y alcordanza al Conseyu Soberanu d'Asturies, que tuvo la so sede oficial nel númberu 3 d'esta céntrica plaza xixonesa nel añu 1937. Ignaciu Llope xustifica 'l simbolismu qu'ello tien nun momentu de redefinición del estáu como'l que nos alcontramos nel que ye fundamental recuperar la memoria d'un pasáu nel que, en momentos difíciles o periodos constituyentes, como la Xunta Xeneral nel 1808 o'l Conseyu Soberanu en 1937, el pueblu asturianu dotóse de mecanismos propios d'autogobiernu basaos na soberanía plena"

La concentración - homenaxe va tener llugar a les 13:00 hores del 8 de setiembre, y va cosistir nuna ofrenda floral y un discursu del historiador y miembru de la Dirección Nacional d'IAS Faustino Zapico, que va centrase na historia y significación actual del Conseyu Soberanu de 1937. IAS va solicitar tamién que se ponga una placa en memoria de la institución na "Casa Blanca" edificiu racionalista obra de Manuel del Busto en que tuvo la so sede'l Conseyu y va reclamar la devolución de los sos archivos.