Izquierda Asturiana preséntase en Mieres con Faustino Zapico de candidatu

El partíu asturianista Izquierda Asturiana (IAS) de Mieres va presentar a Faustino Zapico Álvarez como cabeza de llista electoral pa les próximes elecciones al conceyu del 27 de mayu. Según dio anuncia esti partíu políticu, el restu de la candidatura "tá n'avanzáu procesu d'ellaboración" y va presentase nes próximes selmanes. Dende IAS coméntase que la candidatura por Mieres van formala "persones representatives de les parroquies y la vida social del conceyu".

Faustino Zapico Álvarez ya encabezare la llista de la entós coalición Izquierda Asturiana-Verdes en Mieres nes elecciones del 2003, llogrando ser la 4ª más votada y la primer fuerza política ente les que quedaron ensin representación na casa conceyu, con 344 votos. Nesta ocasión, IAS "aspira a entrar na corporación mierense pa llevar la voz de la izquierda asturianista y verde del conceyu" presentando como puntos fuertes del programa, que va dase a conocer nes próximes selmanes la reactivación económica, la democracia participativa, la vivienda, el mediu ambiente y la llingua y cultura asturianes.


Faustino Zapico tien 36 años y nació en Mieres del Camín. Llicenciáu en Xeografía y Historia pola Universidá d'Uviéu, ye profesor de Enseñanza Secundaria nel IES Sánchez Lastra de Mieres. Autor d'un llibru que ta p'asoleyase sobre'l mayu de 1808 n'Asturies, Zapico foi noticia e lo llargo de los últimos meses por negase la Universidá d'Uviéu a almitir la presentación n'asturianu de la so tésis doctoral, un procesu que ta agora mesmo en manes del Tribunal Constitucional.