Izquierda Asturiana pide que se declaren Bien d’Interés Cultural les antigües mines romanes d’Ayande

Izquierda Asturiana pide que se declaren Bien d'Interés Cultural (BIC)
árees mineres del tiempu de los romanos qu'inda se caltienen "en mui bon estáu" nel conceyu d'Ayande. La formación nacionalista d'izquierdes esplica que los principales xacimientos tán na Cordal del Palu, na parroquia de Bustantigo y n'El Valledor, siendo les del Cordal del Palu "les qu'ufren mayor interés" por caltener un sistema de canales y banzaos mui visible xunto con canalizaciones subterránees y canteres, siendo un valor patrimonial amestáu el pasu pel llugar del Camín de Compostela, del que se guarden restos d'agospios de pelegrinos medievales.

Dende IAS asegúrase que la desprotección de les mines failes mui vulnerables a infraestructures y construcciones modernes como sedríen la carretera d'El Palu, que taraza parte del sistema de canales, o la torreta d'alta tensión, que s'alcuentra llantada "a la vera mesmo de La L.laguna'l Palu" antiguu banzáu pal suministru d'agua nes mines. Inaciu Llope, candidatu d'Izquierda Asturiana pol occidente pidió midíes de protección pa esti restu de gran valor patrimonial, defendiendo "la declaración d'estos espacios como BIC" dalgo que camienten dende IAS que "va traer beneficios económicos al ser un atractivu interesante pa un turismu cultural de calidá".

Como primeros pasos pal so reconocimientu, IAS pide que les antigües mines apaezan nes guíes turístiques y que se señalicen los sos restos.

Xunto con estes midíes Izquierda Asturiana desixe igualmente que l'espaciu protexíu de las sierras de Carondio y El Valledor se declare efectivamente con tala categoría a tolos efectos llegales.