Izquierda Asturiana pide que l'hospital del oriente s’inxerte nel SESPA

El partíu políticu Izquierda Asturiana (IAS) denunció nun comunicáu de prensa la situación del Hospital del Oriente d'Asturies, que, contra la imaxe positiva que tresmite poles sos iniciatives, asegura que ta "faltu de personal y presenta carencies graves"



Ello ye que mientres l'hospital de Les Arriondes ocupa güecu na prensa presentándose como punteru en temes de xestión, siendo'l primer hospital con calefacción por biomasa o porque nelli ye'l mesmu personal d'enfermería el que fai'l siguimientu del paciente dende'l momentu del ingresu hasta l'alta, IAS denuncia que que se dan casos de "multiplicación de xeres pa un únicu profesional que tien qu'asumir el trabayu de tol so departamentu".

IAS califica de "lóxicos" los llogros del hospital parraguesu pero llama l'atención sobre'l fechu de qu'una sola ATS s'ocupe de les estracciones, del bancu de sangre y de les tresfusiones o sobre la falta d'aparatos que s'arrastra dende siempre y qu'amás de dificultar el llabor a los profesionales, "implica una disminución de la prestación y una perda de tiempu pa los usuarios".

En resume IAS defende que los enfermos del Oriente d'Asturies merecen un tratu y unos servicios médicos como'l que tienen los d'Uviéu, Xixón, Avilés o Mieres y pide por ello l'inxerimientu del Hospital del Oriente, xestionáu por una fundación particular, n'alministración pública.