Izquierda Asturiana denuncia que’l Gobiernu asturianu tien “secuestrada” la toponimia

La formación nacionalista d'izquierdes denunció al traviés del so portavoz Ignaciu Llope'l retrasu "sine die" n'instancies del Gobiernu asturianu de los espedientes toponímicos que yá tienen el preste de los sos respectivos conceyos, ello dempués de qu'en tolo que se lleva d'esti añu 2006 entovía nun s'aprobare espediente toponímicu nengún.

La denuncia d'Ignaciu Llope refierse a 9 espedientes qu'asegura que'l Gobiernu asturianu tien "reteníos de forma inxustificada" concretamente los d'Ayer, Colunga, Llaviana, Morcín, Nava, Pezós, La Ribera, Riosa y Samartín del Rei Aurelio una situación que calificó de "intolerable" y de "tomadura de pelo". El portavoz d'IAS denuncia que, anque estos conceyos asturianos aprobaron, nos más de los casos por unanimidá y va meses, la solicitú de que s'oficialize la toponimia tradicional de los sos pueblos y llugares, el gobiernu asturianu ta llevando alantre un llabor de retrasu del procesu a costafecha pa torgar la oficialización real de los nomes de llugar. La última tanda de llistaos toponímicos que s'aprobó pasó per conseyu de Gobiernu en payares del 2005, y correspondió a los conceyos de Sariegu, Cabranes, Villaviciosa y Bimenes.

El portavoz d'IAS echa enriba del PSOE la mayor parte de la culpa d'esti retrasu y camienta que los socialistes en gobiernu d'Asturies "tan sorprendíos del grau d'aceptación que ta teniendo'l procesu de recuperación de la nuestra toponimia incluso nos cuadros locales de les sos propies files" siendo por causa d'ello que l'aparatu socialista intentaría "pel camín de la parálisis alministrativa" consiguir "el so únicu oxetivu de que nun se materialice nesta llexislatura'l más mínimu avance en materia llingüística". Too ello amosaría la "nula voluntá del PSOE de cumplir los escasos compromisos que tien cola ciudadanía en materia llingüística" y la reducción a "retórica y puru teatru del únicu avance que taba dimpuesto a ufiertar el PSOE nesti terrén". Inda más, pa Llope ye evidente que los topónimos de los 10 conceyos que sí llegaron a aprobase en Conseyu de Gobiernu a lo llargo del 2005 "nin siquiera s'empleguen nes publicaciones oficiales".

Respective al papel que nesti procesu tendría de xugar IX-BA, socios minoritarios na coalición de gobiernu y formación más comprometida col procesu de recuperación toponímica, el portavoz d'Izquierda Asturiana afirma que "resulta tan patéticu que nun merez calificación" y asegura que l' actitú del PSOE consiste en "reise na cara de los sos socios" en cuantes que sabe que "la capacidá d'aguante d'IX-BA a los insultos del PSOE ye directamente proporcional al apegu que sienten polos sos puestos y cargos en Gobiernu".