Izquierda Asturiana denuncia l'ausencia del asturianu nes emisiones de la TV autonómica

Izquierda Asturiana (IAS) denuncia que l'aniciu de la TPA confirma el "monumental engañu"que supón el pactu de gobiernu PSOE y IX-BA. La formación nacionalista d'izquierdes emitió un comunicáu en que denuncia la "nula presencia" del asturianu nes emisiones de la TV autonómica, acusando a la canal de ser otra amuesa del incumplimientu flagrante del alcuerdu de gobiernu ente IX-BA y PSOE y "un pasu firme hacia la muerte de la nuestra llingua".

El portavoz d'Izquierda Asturiana Ignaciu Llope recordó que nel pactu de gobiernu firmáu en 2003 pola FSA y IU-BA figuraba lliteralmente l'apueste "por un ente públicu modernu técnicamente, comprometíu cola realidá cultural y llingüística d'Asturies" comprometiendo al empar "un impulsu de la llingua asturiana nos medios de comunicación, sofitando un usu rigurosu y normalizador" y un prometedor "diseñu y usu activu del futuru Ente de comunicación nesi sentíu".

Contra esti compromisu programáticu, el portavoz d'IAS declaró que "el porcentaxe d'emisión na nuestra llingua ye del 0 %, lo que vien a confirmar los piores augurios sobre la presencia del asturianu na televisión publica asturiana y confirma que la burlla del cacarexáu pactu de la izquierda plural algama dimensiones astronómiques". En palabres de Ignaciu Llope "ye una tomadura de pelu, una ironía que'l llema de la televisión autonómica seya "Reflexu d'Asturies" cuando polo que tamos viendo namas que se dedica a reflexar una Asturies monollingüe, ensin personalidá, una Asturies que namás existe na cabeza de los responsables de la FSA. Una Asturies deformada por una visión provinciana y acomplexada que reflexa perfectamente'l proyectu de non-país que tien el gobierno asturianu nel que tolo que remita a identidá molesta y tien de desapaecer".

Amás de reclamar una rempuesta de tol asturianismu énte lo que-y abulta una agresión, IAS denunció'l papel de "collaborador necesariu" que-y paez que xugó IX-BA en tol procesu. Pal portavoz d'IAS "el papel PSOE consiste n'incumplir sistematicamente los sos compromisos, a sabiendes de que la capacidá d'aguante de IU-BA énte los desplantes y insultos del PSOE ye directamente proporcional al amor que tienen éstos a los sos puestos y cargos nel Gobiernu".