Izquierda Asturiana da anuncia que va presentase a les elecciones del 2007

El partíu d'izquierda asturianista declara que con ello quier "entamar a iguar una alternativa electoral que dea nun cambéu real frente al desgobiernu del PSOE-IX y el continuismu del PP".

La decisión d'Izquierda Asturiana de presentar llistes a les autonómiques del 2007 adoptóla la Dirección Nacional del partíu siguiendo'l mandáu del VI Alcuentru Nacional del partíu que se celebrare nel pasáu mes de xineru y nel que la mayoría de los militantes de la formación yá espresaren la so voluntá de presentase a la convocatoria electoral que va tener llugar en mayu del 2007.

El procesu de preparación de programa y llistes va tar al cargu d'una comisión electoral coordinada por Carlos Fernández y presidida pol Secretariu d'Acción Política del partíu contando con representantes de les distintes agrupaciones d'Izquierda Asturiana. El calandariu que se marca la formación d'izquierdes nacionalista pasa por trabayar a lo llargo del branu na ellaboración de les llinies básiques de los programes autonómicos y municipales, dinamizando los procesos d'ellaboración de les llistes y la escoyeta de los cabezaleros de llista, tanto nos conceyos como nes candidatures autonómiques. Al empar, la formación va entamar una rueda de contactos con axentes sociales y colectivos col envís de pañar les sos aportaciones pa la ellaboración de los programes electorales. Esta rueda de contactos va espurrise tamién a aquellos colectivos ciudadanos, grupos d'electores o formaciones polítiques que presenten coincidencies coles llinies programátiques d'Izquierda Asturiana pa estudiar posibles alcuerdos.

IAS da anuncia de que la so decisión de presentase a les elecciones de 2007 parte de "la demanda qu'existe n'Asturies d'un proyectu asturianista, d'izquierdes y ecoloxista como'l que representa IAS, que lluche por un cambéu de paradigma na forma de facer política n'Asturies y na visión del país y qu'ha contraponese tanto al modelu del PSOE-IX como al del PP que yá demostraren abondo la so incapacidá pa ufrir alternatives válides a la situación d'arrequexamientu y galbana na que s'alcuentra'l nuesu país".