Izquierda Asturiana aspira a llograr representación na casa conceyu de Piloña

L'agrupación d'Izquierda Asturiana en Piloña presentó'l pasáu llunes al so candidatu a l'alcaldía del conceyu pa les elecciones del próximu mes de mayu. Al frente de la lista d'Izquierda Asturiana (IAS) - Asturianistes por Piloña va tar otra vegada José Ángel García "Allende" que na pasada convocatoria del 2003 quedó a un puñáu de votos de llograr representación pa la fuerza asturianista nesti conceyu del oriente asturianu.

El responsable de campaña d'IAS de Piloña Iván Huerga adelantó que la llista y el programa de la formación, que van conocese nes próximes selmanes, van presentar "abondes novedaes" nel trescursu d'un actu que presentó'l periodista José García Medina. El candidatu José Ángel García "Allende" definió la llista d'IAS como un "revulsivu" pa un conceyu como Piloña, nel que namás gobernaron dende la llegada de la democracia mayoríes absolutes del PSOE y del PP y nel qu'IAS aspira a ser la tercer fuerza con representación na casa conceyu pa evitar que nenguna de les dos formaciones tenga "un cheque en blanco". Allende definió a IAS como "l'auténtica oposición" a lo llargo d'estos cuatro años en cuantes que, con nun tener representación nel Ayuntamientu, les propuestes d'IAS "marcaron y condicionaron el debate políticu".