Izquierda Asturiana afirma que’l centru de CO2 anunciáu pol Gobiernu ye “una maniobra pa xustificar la térmica de La Perea"

El portavoz de l'agrupación de Mieres d'Izquierda Asturiana (IAS) de Mieres retrucó a les anuncies d'instalación d'una instalación pionera n'España p'atropar Dióxidu de Carbonu de l'atmósfera feches pol Presidente asturianu Vicente Álvarez Areces, afirmando que la inversión anunciada y que tendría Mieres por escenariu supón "una maniobra a la desesperada pa xustificar el proyectu de central Térmica en La Perea". Zapico recuerda que "la captación de co2 namás ye, pel momentu, una prueba de llaboratoriu" y que nun va poder facese cargu del gas emitíu en la Perea".

Según Zapico "con esta anuncia pretende maquillase un proyectu altamente contaminante que namás garra toma forma pa facer irreversible la llinia d'alta tensión Lada-Velilla". El portavoz d'Ias en conceyu Mieres alvierte que, por ser Asturies mui escedentaria en producción eléctrica y la comunidá autónoma que más co2 emite por ciudadanu" ye "un escándalu que se quiera engañar a los mierenses con esti timu que se viste d'ecolóxicu y d'avance tecnolóxicu cuando nun ye más qu'una vaga idea a la que s'agarren por nun contar con argumentos sólidos" énte "les crítiques que recibe l'ampliación de la central térmica de La Perea, pa la que yá existe un alcuerdu ente Hunosa, titular de l'actual térmica y la eléctrica Endesa. La central térmica que se cuenta con facer va tener 400 mw de potencia y ye'l primeru de los dos grandes proyectos de la eléctrica española n'Asturies xunto cola que tien proyectada n'Aboño.

IAS acusa al Gobiernu asturianu de querer facer cómpliz al Institutu Nacional del Carbón (INCAR) "de lo que va ser una rémora contaminante p'Asturies" y la realización "d'una concepción enerxética que naide, n'Europa nin nel estáu español, defende nos nuestros díes". El portavoz d'IAS en Mieres afirma que "lo que se quier vender ye una instalación que va sirvir pa investigar les técniques de retención de CO2 pero que de nenguna manera va atropar co2 en la Perea. Faustino Zapico alvierte tamién del peligru de que se gasten en facer esta instalación "más fondos europeos en condenar el futuru mediuambiental d'Asturies ensin torna posible en cuenta d'ayudanos a salir de la crisis".

Faustino Zapico fai una llectura mui crítica de lo que supón l'anuncia de la planta esperimental de CO2, afirmando que nun momentu en que'l cambéu climáticu garra protagonismu como lo ta faciendo "a los políticos del PSOE y los sos socios de gobiernu metióse-yos na cabeza qu'Asturies bata tolos records d'emisiones" al empar que "xueguen públicamente con idees de ciencia ficción pa xustificase y engañar a los ciudadanos" alvirtiendo que la so formación política va entamar "toles acciones llegales posibles" contra esti "proyectu absurdu".