El coleutivu Ixuxú entama un conciertu de Su Ta Gar n'Uviéu

|

Ixuxú Asturies-Euskal Herria elkartea trai a Asturies al grupu vascu Su Ta Gar, que va actuar esti vienres n'Uviéu. El sábadu va tar Evaristo (Gatillazo) en Xixón firmando llibros.

La veterana banda de heavy metal d'Eibar, que collaborara nel históricu discu 'L'asturianu muévese' (L'Aguañaz) cola versión n'asturianu de 'Beldurraren jainkoak (Dioses del terror)', torna a Asturies depués de munchos años d'ausencia gracies a la iniciativa d'esti coleutivu d'asturianos emigraos a Euskal Herria que fai de ponte sociocultural ente los dos pueblos. Asina, la formación vasca va tar presente esta nueche, dende les 21 hores, na sala uviedina Lata de Zinc dientro de la xira de presentación del discu 'Bizirik gaude'. El preciu na puerta ye de 10 euros.

Otra manera, esta asociación tamién collabora na presentación entamada pol Centru Social Sestaferia del llibru d'Evaristo Páramos, cantante actual de Gatillazu que se fixera célebre al frente de La Polla Records, 'Cuatro estaciones hacia la locura'. Ésta va celebrase mañana, a les 18 hores na sidrería xixonesa Canteli y el músicu vascu d'orixe gallegu va tar firmando exemplares hasta les 20 hores. Darréu, va tener llugar una folixa en Sestaferia hasta medianueche. Los responsables del centru social dan la opción, nel casu de nun poder acudir a la cita, de reservar un llibru firmáu por Evaristo al traviés de Facebook.

Contador Estadistiques