IX y Bloque piden la oficialidá del asturianu na so propuesta d'estatutu

IX y Bloque por Asturies presentaron ayeri la so propuesta conxunta de reforma del Estatutu d'Autonomía, un documentu que Rafael Palacios y Jesús Iglesias definieron como un proyectu que va permitir desarrollar l'autogobiernu y la identidá cultural y llingüística d'Asturies.

Dambes fuerces entienden que l'actual estatutu yá ta escosáu y que la reforma estatutaria que va entamase n'Asturies va tener llugar nun momentu históricu que va suponer una revisión del modelu d'Estáu nel que diba ser "un suicidiu p'Asturies" quedar al marxe y pasar a una posición de subordinación respective a les demás comunidaes.

Ente les competencies nueves y diferencies respective al estatutu actual, la propuesta conxunta d'IX y Bloque pasa por que se cree una sola circunscripción electoral en cuenta de les trés esistentes anguaño al empar qu'una xuba de los escaños de la Xunta Xeneral del Principáu hasta los 60 diputaos. La creación d'un nucleu competencial propiu de los conceyos asturianos, un modelu de financiación que-y garantize a l'autonomía recursos abondos con plena capacidá de xestión de los mesmos, competencies mayores en mediu ambiente y medios de comunicación y la posibilidá de qu'Asturies pueda mandase institucionalmente énte la Unión Europea son otres novedaes propuestes nel terrén institucional.

La propuesta de reforma d'IX-BA define l'asturianu define al asturianu como "llingua propia d'Asturies" en réxime de cooficialidá col castellanu, reconociendo'l derechu de los ciudadanos al emplegu de la llingua propia en toles circunstancies. No tocante a esta cuestión, Iglesias y Palacios enfótense en que PP y PSOE sían racionales y traten al asturianu cola mesma seriedá que tienen estos partíos n'otres comunidaes con llingua específica.

Ente les competencies nueves que demanden IX-BA conséñense midíes que permitiríen una mayor autonomía nes polítiques d'industria, los recursos y aprovechamientos hidráulicos, nel fomentu y xestión de les enerxíes renovables, na seguridá social y tamién el desarrollu de competencies sobre la rede viaria asturiana.

Los representantes de dambos partíos dieron anuncia de que cuenten con llevar a la sociedá asturiana'l conteníu del testu al traviés d'una campaña d'alcuentros cola ciudadanía pa qu'esta puea valorar la falta qu'hai de reformar l'estatutu.