IX, PP y Foro abrieron les negociaciones de los Presupuestos del 2022

|
Adrián Barbón, Ángela Vallina y Ovidio Zapico IX negociación de los Presupuestos 2022

Los alcuentros con Podemos y Ciudadanos, pela tarde, con VOX apartáu de los contautos.

Esta mañana tán celebrándose en Presidencia los primeros contautos del Gobiernu y el grupu parllamentariu socialista col restu de fuercies polítiques de cara los Presupuestos del 2022. Izquierda Xunida (IX) foi, a les 9.30 hores los primeros, pa siguir a les 11 hores el PP y nestos momentos Foro.

Por parte socialista tán presentes el presidente Adrián Barbón; el vicepresidente y conseyeru d'Alministración Autonómica, Mediu Ambiente y Cambiu Climáticu, Juan Cofiño; la conseyera de Facienda, Ana Cárcaba; la vocera na Xunta Xeneral, Dolores Carcedo; y la secretaria d'Organización de la Federación Socialista Asturiana (FSA-PSOE), Gimena Llamedo. Pela tarde van siguir les negociaciones con Podemos a les 17 hores y con Ciudadanos, a les 18.30.

Defensa del Estáu Social

La coalición, a la so salida, rescampló les coincidencies nes cuestiones más importes y consideró que socesiones nun ha ser revisáu nes cuentes, que contarán con una pequeña baxada del techu de gastu, que s'asitia en 4.608 millones de euros, 5 cinco menos qu'esti añu, y una reducción de 257 millones na previsión d'ingresos. "Abiertos como tamos a la negociación, entendemos que na negociación hai que facer cesiones pero hai que respetar, siempre, y caltener la identidá de caún. Y na identidá d'IX ta la construcción d'un Estáu Social. L'Estáu Social constrúise con impuestos y hai impuestos, como pueda ser socesiones, que nun tie que ser oxetu de revisión", aseguró el coordinador xeneral, Ovidio Zapico, sobre la esixencia de Foro p'apoyar la reforma del Estatutu y la oficialidá.

Maga la cercanía cola FSA, confirmó que'l sofitu d'IX entovía nun ta peslláu, y que va treslladar una propuesta que "debería de ser el esquema, l'arquiteutura, de los próximos Presupuestos", calcando na defensa de los servicios públicos, la concertación social, cuestiones medioambientales y un impulsu a los conceyos.

Na imaxe, Barbón presidiendo la mesa cola vocera parllamentaria Ángela Vallina, Zapico y el coordinador del grupu parllamentariu d'IX, Jorge Pardo, nun llau; y Cárcaba, Llamedo y Carcedo, nel otru. Semeya obra d'Armando Álvarez.

Contador Estadistiques