IX pide un “Institutu de la Memoria Democrática Asturiana”

Izquierda Xunida d'Asturies presentó ayeri una proposición non de Llei énte la Xunta Xeneral del Principáu pa que se debata en Plenu la creación d'un "Institutu de la Memoria Democrática Asturiana", que tendría les funciones de "sofitar a les víctimes y los sos familiares y que-yos dea'l reconocimientu y les compensaciones a les que tienen derechu". La formación propón como sede l'edificiu de l'antigua fábrica de tabacos de Xixón, onde podría facese tamién l'archivu de tola documentación sobre la represión na dictadura franquista.

La entidá encargaríase de la conmemoración, conservación y espardimientu de fechos rellacionaos cola II República, la Guerra Civil, la represión franquista, l'exiliu y la llucha poles llibertaes, y la so dirección complementaríase con un órganu asesor y un conseyu de participación. Jesús Iglesias y Jesús Montes Estrada presentaron la proposición acompañaos de Víctor Díaz, de la Unión Cívica pola República, y del coordinador n'Asturies de l'Asociación d'ex Presos del Franquismu, Manuel Otones.