IX manifiesta la so decepción tres la visita de Pastor pola ausencia de plazos pa la llegada del AVE

Aurelio Martín calificó de “decepcionante” la visita al país de la ministra de Fomentu, Ana Pastor. Izquierda Xunida (IX) señaló que ye “una tomadura de pelo” que nun diera plazos pa la llegada del AVE a Asturies.
 
El diputáu de la Xunta Xeneral tamién señaló que’l Gobiernu de Zapatero comprometióse a que l’alta velocidad coneutaría Asturies cola Meseta nel 2009. "Tamos nel 2012 y la ministra visita Asturies pa dicir que nun sabe cuándo va a acabase", criticó. Si esto resulta "sangrante", continuó Martín, "tamién lo ye que’l tramu Lleón-La Robla siga n’Estudiu Informativu y ensin fecha pa terminalu. Ye evidente que se trata d’una maniobra pa retrasar la inversión y, poro, los plazos consiguientes”.
 
Nuna situación similar ta’l tramu Ḷḷena-Xixón, "del que nin se sabe nin se diz nada". Según Martín, "los asturianos vemos cómo los grandes partíos incumplieron los sos compromisos con Asturies y cómo’l PP pretende siguir na sienda d’incumplimientos que denunciaben de manera reiterada los sos dirixentes autonómicos cuando taben na oposición". La coalición demanda, igual que fixo cuando gobernaba’l PSOE, un calendariu pa la finalización de les infraestructures asturianas principales, dalgo no que va insistir tanto nel Congresu como na Xunta Xeneral. "Estos incumplimientos pueden facese estensivos a l’Autovía del Cantábricu, yé qu’esisten dos tramos, Otur-Viḷḷapedre y Pendueles-Unquera, pa los que tampoco hai plazos de conclusión", finó.
 
Un aumentu de la financiación del 38 por cientu, según Pastor
 
Na so visita, Pastor destacó que’l so departamentu incrementu un 38 por cientu’l presupuestu pa la llegada del AVE a Asturies respeuto al añu pasáu, anque precisó que "queda muncho por facer". La ministra fixo estes declaraciones ayeri en Campumanes, onde se desplazó pa visitar les obres de la variante de Payares. Ellí calificó de “prioritaria” la comunicación d’Asturies cola meseta al traviés de l’alta velocidá y comprometióse a que nun “va faltar un euru” pa terminar los trabayos, anque nun dio plazos. Na so estancia nel país, Pastor tamién tuvo nes obres de l’Autovía del Cantabricu pal occidente,en concretu nel tramu Otur-Viḷḷapedre.