IX d’Uviéu pide que s’investigue la llegalidá de la cantera de Calieros de Brañes

El grupu d'Izquierda Xunida d'Uviéu pidió un informe de los Técnicos del conceyu sobre a llegalidá de la esplotación de Calieros de Brañes dientro de la finca "La Costaliega" que figura escriturada a nome del conceyu. Esta empresa, que desarrolla la so actividá estractiva na fastera del Monte Naranco, pidiera l'añu pasáu l'ampliación de la so cantera al empar que'l Gobiernu asturianu declarare la so intención de facer del Naranco espaciu protexíu dientro del parque periurbanu del Naranco.

El parque yá ta en fase d'Información Pública, mientres que l'executivu asturianu dexare en suspenso l'ampliación de la cantera al emitir informe negativu la Comisión de Mediu Ambiente.

Dende IX d'Uviéu recuerden que yá pidieren otres vegaes que s'aclariare l'actividá de la empresa y declaren que "ye'l momentu afayadizu pa que, enantes d'aprobar el Proyectu de Parque Periurbanu, s'esclarien delles cuestiones tocante a la esplotación de Calieros de Brañes" qu'asegura que "ta ampliándose a costa d'una faza que ye de propiedá del conceyu d'Uviéu", polo que pide que nun se conceda más ampliación de la cantera.