IX-BA pide nuna proposición non de llei a la Xunta Xeneral “que se recupere’l ritmu d’oficialización de topónimos”

El Grupu Parlamentariu d'Izquierda Xunida - Bloque por Asturies presentó esta mañana en Rexistru de la Xunta Xeneral del Principáu una proposición non de llei na que "encamienta al Conseyu de Gobiernu a recuperar el ritmu normal nel procesu d'aprobación de Decretos d'oficialización toponímica, dando cumplimientu a les peticiones de los conceyos involucraos nel procesu y entainando cola aprobación de los espedientes pendientes".

Na esposición de motivos, IX-BA sorraya que n'actualidá hai un total de 46 conceyos que-y solicitaron a la Xunta asesora de toponimia entamar el so espediente de recuperación toponímica, de los que 10 yá recibieron l'aprobación, pero recuerda que l'últimu en recibila foi con fecha del 17 de payares del 2005, tando 17 espedientes más yá col preste de los sos respectivos conceyos y pendientes namás del trámite en Conseyu de Gobiernu, polo qu'IX presenta la proposición non de llei "en cumplimientu de les acciones previstes nel plan de normalización del asturianu".

La Proposición non de llei d'IX-BA vien dempués de qu'ayeri se celebrare una sesión más del Conseyu de Gobiernu na que nun se trató nengún espediente toponímicu, ello nuna institución na que participen los conseyeros d'IX-BA como parte del gobiernu asturianu y tres de seyes meses ensin aprobación d'espediente nengún, un retrasu que nun tien esplicación oficial. D'otra manera, IX-BA presenta la proposición nún de los momentos más difíciles de la so rellación cola FSA-PSOE a lo llargo de la llexislatura a cuenta del casu del repartu de cargos de la Procuradoría Xeneral.